Accéder au contenu principal

Mèsi papa Desalin

Mès rekwiyèm 17 oktòb?
Ki moun ki pral Katedral?

Diskou Minis?
Ki moun k’ap koute sa?

Men, sa m di la a
Se yon sèl mo : mèsi
Mèsi Desalin papa m

Gen moun ki pa konnen
Fò m di yo
San ou nou pa ta la a
Mèsi, papa Desalin

Epi, fini ak Patè Nostè w la a
Monseyè, Desalin pa mouri

Ase pale franse, Minis
Desalin p ap janm mouri
Desalin la
Nèg sa a ta ka mouri!

Desalin nan kè m
Lam-o-pye

Desalin ap veye
Yon jou Desalin va leve

Jou sa a, nou tout n a konnen
N a konnen si 1804
N a konnen si Lakayè
N a konnen si Lakrèt-a-Pyewo
N a konnen si Vètyè
Desalin te fè tout sa
Pou ti nèg ekri powèm
Pou Minis fè diskou
Pou pè chante Te Deoum
Pou Monseyè bay labsout

Desalin pa bezwen labsout
Tout sa Desalin fè bon

Yon jou Desalin va leve
W a tande nan tout lanmè Karayib
Y ape rele kote l
Desalin pran lèzam
Arete l
Lè a, w a tande vwa l kon loray
Tout nèg koupe tèt boule kay

W a tande nan tout Lamerik
Y ape rele : rete l

Vwa Desalin deja nan radyo
Koupe tèt boule kay

Nan tout « Harlem » Desalin ap mete lòd
W a tande : bare Desalin

Jouk « Dakar »
Jouk « Johannesburg »
W a tande: kote Desalin pase?
Koupe tèt boule kay
Desalin pa bezwen labsout
Pa bezwen padon Bondye

Okontrè : Desalin se bra Bondye
Desalin, se jistis Bondye
Pa bezwen Patè Nostè Monseyè
Ni eskiz nèg yo vle mande blan yo
Desalin pa bezwen

Pou tou sa l fè m di : papa Desalin, mèsi

Pou tou sa l pral fè
M di : mèsi, papa Desalin

Le Temps Littéraire Tout afficher

Magazine d'art, de littérature et des idées

Laisser un commentaire

%d blogueurs aiment cette page :